Som i fjor, 11. juni kom første geitflokken på setra! Etter nokre dagar med «rigging», vasking av mjølkestall, tankrom og alt av utstyr var den store dagen komen. Ein høveleg dag, ikkje for heitt og sola ikkje for skarp. Flokken tel knapt 150, mange veteranar, men også ein flokk unggeit som ikkje har vore på setra før. No gjeld det å finne dei saftigaste beita og kome inn i rutinane i fjøset!

Så er nok ein setersommar over. 20. september vandra Dale-geitene heim, etter å ha vore på setra sidan 11. juni, og nytt ein fin sommar.

Mykje av tida har geitene vore i lag med «budeiene» Brona og Isaac frå Spania (veterinærstudentar frå Barcelona) og Antoine (landbruksstudent frå Frankrike). Vandra er forresten ikkje rette ordet, fleirtalet av dei sprang – i år som i fjor! Hadde ikkje tid til å nyte godsakene langs vegen. Og såleis vart dei tobeinte som følgde og tok i mot sett på prøve! Desse var: Christin og Nils, Antoine, praktikantane Marie og Julia frå Austerrike, og sjølfolket Åshild og Jostein. – Og i dag, 2. oktober, kom dei siste 12 kjea/unggeitene i hus, etter å ha halde til i frukthagane kring husa dei siste vekene. Så da er vel sommaren over …

Ein fin, mangfaldig og minnerik sommar er over, og her er eit lite utval av bilete frå sommaren 2025. Aktivitetar og gjestar – til gards og til seters – prega også denne sommaren. Cruise-turistane tok oss i mot på garden, der innføring i ysting, vandring i hagen, ostebord og opplevingar med kje høyrer med. Andre tok turen til seters, der det både var kurs i ysting og markering av at området fekk Unesco-status for 20 år sidan og at norsk og svensk seterkultur vart skreve inn på Unesco-lista over immaterielle kulturarv i desember 2024.

11. juni var det klart for «seterjaging». Dei raskaste gjorde unna dei 9 kilometrane på vel tre timar. Litt regn jagardagen, men no nyter både geit og folk eit nydeleg ver! Vonar sommaren blir fin og at vi kan ha geitene på setra til sist i september. Mjølka frå dei første måla blir nytta til lokal foredling, og den 12. heldt Åshild eit internt ystekurs for Belen frå Argentina, Bozena frå Tsjekkia og Nils og Mila frå Dalsbygda.