23. september var det slutt på ein lang og god setersommar for geitene våre. To dagar seinare la snøen ….Godt over tre månader fekk Dale-geitene på setra i år! Dei fleste var ivrige på heimturen, andre dukka ikkje opp til siste mjølkinga. Dermed måtte eldste «gjetarguten» (Jostein) leggje i veg for å finne dei…. med knall og fall som resultat, og avrevne musklar i skuldra som resultat. Dei 9 kilometrane heimover gjekk så det bles, og i eit forsøk på å kome framom dei ivrigaste unggeitene gjekk det hard ut over venstre akilles på nemnde gjetargut…. Ja, det er vel ein del av «seterkulturen» dette og!

16. juni vart dagen for «seterjaging» i år. Det var som om geitene forsto kva som skulle skje og gledde seg. Likevel snudde dei nokre gonger og sprang ned att i fjøset før dei la i veg framover – og etter tre timar var vi frame på setra. Ein fin jagardag, ikkje for varm. Dei bratte bakkane er krevjande for både dyr og folk, i allefall i solsteik. Det slapp oss i år, grått og litt regn innimellom. Men fint å ta små pausar for å halde flokken samla, og for å nyte turen. Så er det berre å håpe på ein fin sommar!

Både dyr og folk lengtar til setra! Og den tidlege våren gjer at arbeidet med å få alt i stand til setersommaren 2024 er i full gang. Håpet er å kunne ta fatt på setervegen snart. Men først må sel og fjøs settast i stand og mykje gjerde vølast og fornyast etter vinteren. Det krev mykje innsats å ha eit «driftssenter» i fjellet i tillegg til det ein har heime, og vona er at fornyinga av fjøset, som starta for fullt i 2022, vil bli fullført dette året. Både folk og dyr ser fram til minst tre månader på setra!